گلستانِ جوہر رینجرز کمپنی حملہ کیس: کالعدم الاحرار کے عمر قاری سمیت 6 دہشت گرد ماسٹر مائنڈ قرار، سی ٹی ڈی کی رپورٹ عدالت میں جمع

انسدادِ دہشت گردی کی منتظم عدالت میں گلستانِ جوہر میں رینجرز کی ٹرانسپورٹ کمپنی پر حملے اور خودکش دھماکے کے کیس میں اہم پیش رفت سامنے آئی ہے۔ کاؤنٹر ٹیررازم ڈیپارٹمنٹ (CTD) پولیس نے واقعے کی ابتدائی رپورٹ عدالت میں جمع کرا دی ہے، جس میں کالعدم جماعت الاحرار کے کمانڈرز سمیت 6 دہشت گردوں کو حملے کا ماسٹر مائنڈ قرار دیا گیا ہے۔

سی ٹی ڈی کی جانب سے جمع کرائی گئی رپورٹ کے مطابق، پولیس نے کالعدم جماعت الاحرار کے کمانڈر عمر قاری، ملا عمر، مولوی احرار اور عبدالواجد سمیت دیگر ملزمان کو واقعے کا ماسٹر مائنڈ قرار دیتے ہوئے انہیں مفرور نامزد کر دیا ہے۔  رپورٹ میں بتایا گیا ہے کہ 27 جون کو رات 8 بج کر 10 منٹ پر گلستانِ جوہر میں واقع ٹرانسپورٹ کمپنی کے ورکشاپ گیٹ پر ایک خودکش دہشت گرد نے خود کو دھماکے سے اڑا لیا تھا۔ گیٹ پر تعینات رینجرز اہلکار حوالدار ریاض، سپاہی داؤد پرویز اور سپاہی عبدالقدیر فرض کی راہ میں بہادری سے لڑتے ہوئے موقع پر ہی شہید ہو گئے تھے۔

دھماکے کے فوری بعد رینجرز اور سیکیورٹی فورسز کی بھرپور جوابی کارروائی میں دو دہشت گرد ہلاک ہو گئے، جبکہ ایک دہشت گرد عثمان عرف علی کو زخمی حالت میں گرفتار کر لیا گیا۔

دورانِ تفتیش گرفتار زخمی دہشت گرد عثمان عرف علی نے سنسنی خیز انکشافات کرتے ہوئے اپنے ہلاک ہونے والے ساتھیوں کے نام عمر اور عبدالہادی بتائے، جبکہ خود کو دھماکے سے اڑانے والے خودکش حملہ آور کی شناخت ‘جانان’ کے نام سے کی ہے۔ پولیس کی جانب سے واقعے کی مزید تفتیش اور مفرور دہشت گردوں کی گرفتاری کے لیے چھاپے مارے جا رہے ہیں