حکومتی پالیسیوں کے ثمرات عوام تک پہنچنا شروع، جلد بہتری آئے گی: رانا تنویر حسین

وفاقی وزیر برائے قومی غذائی تحفظ و تحقیق رانا تنویر حسین نے کہا ہے کہ وزیراعظم شہباز شریف کی قیادت میں حکومتی پالیسیوں کے مثبت ثمرات عوام تک پہنچنا شروع ہو گئے ہیں اور موجودہ معاشی و عالمی مشکلات کے بعد ملک میں جلد بہتری آئے گی۔

اپنے آبائی علاقے شیخوپورہ میں میڈیا سے گفتگو کرتے ہوئے وفاقی وزیر نے کہا کہ موجودہ حکومت نے دن رات محنت کر کے ملک کو ڈیفالٹ کے خطرے سے بچایا اور ہر شعبے میں عام آدمی کی زندگی آسان بنانے کے لیے اقدامات کیے۔ تاہم، خلیج میں جاری جنگی حالات اور خطے کی صورتحال کے باعث عالمی سطح پر جو اثرات مرتب ہوئے، ان کی وجہ سے عوام کو توقع کے مطابق فوری ریلیف دینے کی کوششیں متاثر ہوئی ہیں۔

زرعی شعبے سے متعلق گفتگو کرتے ہوئے رانا تنویر حسین نے بتایا کہ حکومت کسانوں کو ان کی فصلوں کی پوری اور منافع بخش قیمت کی ادائیگی کے لیے عملی اقدامات کر رہی ہے۔ انہوں نے اعلان کیا کہ گندم کی نئی قیمت 4 ہزار 500 روپے فی من مقرر کر کے کاشتکاروں کو بڑا ریلیف دیا گیا ہے، جبکہ کھاد کی قیمتوں میں استحکام برقرار رکھا گیا ہے۔ اس کے علاوہ زرعی پیداوار بڑھانے کے لیے معیاری بیجوں کی فراہمی بھی یقینی بنائی جا رہی ہے تاکہ ملک میں خوراک کی سیکیورٹی مضبوط ہو سکے۔