ہر جماعت کو پرامن احتجاج کی اجازت، پرتشددکی نہیں: رانا ثنا اللہ

وزیراعظم کے مشیر رانا ثنا اللہ نے کہا ہے کہ آئین و قانون کے دائرے میں تمام سیاسی جماعتوں کو پرامن احتجاج کی مکمل اجازت ہے، تاہم کسی بھی صورت پرتشدد سرگرمیوں یا امن و امان کی صورتِ حال خراب کرنے کی اجازت نہیں دی جائے گی۔ ایک نجی ٹی وی پروگرام میں گفتگو کرتے ہوئے انہوں نے انکشاف کیا کہ سیاسی پسِ پردہ رابطے جاری ہیں، جبکہ وزیراعلیٰ خیبرپختونخوا سہیل آفریدی کے دو واضح مقاصد ہیں؛ اول بانی پی ٹی آئی کی رہائی اور دوم وفاقی حکومت کا خاتمہ۔

رانا ثنا اللہ نے کہا کہ سہیل آفریدی اپنی تقاریر میں بانی پی ٹی آئی کو رہا کروائے بغیر واپس نہ لوٹنے کے دعوے کر رہے ہیں اور اسلام آباد کی جانب مارچ کی باتیں کر رہے ہیں، حالانکہ رہائی کا معاملہ عدالتی ہے اور اس سے متعلق درخواستیں اعلیٰ عدلیہ میں زیرِ التوا ہیں۔ صوبوں کے قیام اور ریفرنڈم سے متعلق بحث پر گفتگو کرتے ہوئے انہوں نے وضاحت کی کہ اس بارے میں کوئی بھی حتمی فیصلہ حکومت کے نہیں بلکہ پارلیمنٹ کے دائرہ اختیار میں ہے، اور آئین کے تحت ریفرنڈم کا اختیار بھی پارلیمنٹ کے مشترکہ اجلاس کو ہی حاصل ہے۔