یمنی حوثیوں کا سعودیہ کے کنگ خالد ایئربیس پر میزائلوں اور ڈرونز سے حملوں کا دعویٰ

یمن کے حوثی جنگجوؤں نے سعودی عرب کے جنوبی شہر خمیس مشیط میں واقع اہم ملٹری ائیربیس “کنگ خالد ائیربیس” پر بیلسٹک میزائلوں اور ڈرونز سے بڑے پیمانے پر حملہ کرنے کا دعویٰ کیا ہے۔ حوثی عسکری ترجمان کے مطابق اس کارروائی میں درجنوں بیلسٹک میزائل اور ڈرونز استعمال کیے گئے، جن کے ذریعے سعودی ایئر فورس کے طیاروں کے ہینگرز، رن ویز، جدید ریڈار سسٹمز اور گولہ بارود کے ذخائر کو نشانہ بنایا گیا۔ ترجمان کا کہنا ہے کہ یہ کارروائی سعودی عرب کی جانب سے یمن پر کی جانے والی حالیہ ہوائی کارروائیوں کے جواب میں کی گئی ہے۔

دوسری جانب، سعودی عرب کی ایسٹ ویسٹ آئل پائپ لائن کو پہنچنے والے شدید نقصان کی تازہ سیٹلائٹ تصاویر منظر عام پر آ گئی ہیں، جس کے بعد اس پمپنگ اسٹیشن اور پائپ لائن کی تمام تر عملیات معطل کر دی گئی ہیں۔ جاری کردہ تصاویر میں پائپ لائن کے پمپنگ اسٹیشن کو پہنچنے والی تباہی اور سیکیورٹی نقصان کو واضح طور پر دیکھا جا سکتا ہے۔ واضح رہے کہ بحیرۂ احمر کو ملانے والی اس انتہائی اہم ایسٹ ویسٹ آئل پائپ لائن پر چند روز قبل عراق سے ڈرون حملہ کیا گیا تھا، جس سے عالمی منڈی میں خام تیل کی فراہمی اور قیمتوں پر شدید اثرات مرتب ہو رہے ہیں۔