مودی سرکار طلبہ کے گھروں میں غنڈے بھیج کر معافیاں منگوانے کی کوشش کررہی: راہول گاندھی

کانگریس کے سابق صدر اور لوک سبھا میں قائد حزب اختلاف راہول گاندھی نے مودی حکومت کو شدید تنقید کا نشانہ بناتے ہوئے کہا ہے کہ پرامن طور پر احتجاج کرنے والے نوجوانوں کو تشدد، دھمکیوں اور ہراسانی کا سامنا کرنا پڑ رہا ہے اور حکومت طلبہ کے گھروں میں غنڈے بھیج کر ان سے معافیاں منگوانے کی کوششیں کر رہی ہے۔ نئی دہلی میں مختلف ریاستوں سے آئے ہوئے طلبہ کے ساتھ پریس کانفرنس کرتے ہوئے راہول گاندھی نے کہا کہ ان طلبہ نے آئین، تعلیمی نظام اور ملک کے مستقبل کے لیے آواز اٹھائی اور کسی قسم کا تشدد نہیں کیا، اس کے باوجود ان پر لاٹھیاں برسائی گئیں اور انہیں اب بھی مسلسل ہراساں کیا جا رہا ہے۔ انہوں نے طلبہ کی حوصلہ افزائی کرتے ہوئے کہا کہ ان سے کسی غلطی کا ارتکاب نہیں ہوا، اس لیے انہیں کسی سے معافی مانگنے کی کوئی ضرورت نہیں ہے۔ راہول گاندھی نے بھارتی وزیر داخلہ امیت شاہ کو براہ راست جواب دہ ٹھہراتے ہوئے کہا کہ اگر یہ کارروائی ان کے علم کے بغیر ہوئی تو وہ ناکام ہیں، اور اگر ان کے حکم پر ہوئی تو وہ اس کے ذمہ دار ہیں؛ انہوں نے مزید کہا کہ نریندر مودی اور امیت شاہ میں اتنی ہمت نہیں کہ وہ اس معاملے پر میڈیا کے سامنے آکر سوالات کے جواب دے سکیں۔