تیل کی قیمت 150ڈالر فی بیرل تک جاسکتی ہے،قطری وزیرتوانائی نے خبردارکردیا

قطر کے وزیرتوانائی نے خبردارکیاہےکہ مشرقِ وسطیٰ میں جنگ کے باعث تیل کی قیمت 150 ڈالر فی بیرل تک جاسکتی ہے۔کہا اگر جنگ جاری رہی تو خلیجی ممالک چند ہفتوں میں توانائی کی برآمدات روکنے پر مجبور ہو جائیں گے۔

قطر کے وزیرِ توانائی سعد الکعبی نے ایک برطانوی اخبار کوانٹرویومیں واضح کیا ہے کہ اگر ایران کے ساتھ تنازع جاری رہا اور تیل کی قیمت 150 ڈالر فی بیرل تک پہنچ گئی تو تمام توانائی پیدا کرنے والے خلیجی ممالک چند ہفتوں میں برآمدات بند کرنے پر مجبور ہو جائیں گے۔

قطری وزیر نے کہا کہ اگر یہ صورتحال جاری رہی تو آئندہ چند دنوں میں خلیج کے تمام برآمد کنندگان کو معاہدے پر عمل درآمد روکنا پڑے گا۔ اگر یہ جنگ چند ہفتے جاری رہی تو دنیا بھر میں جی ڈی پی کی شرحِ نمو متاثر ہوگی اور توانائی کی قیمتیں بڑھیں گی، کچھ مصنوعات کی قلت ہوگی اور فیکٹریوں کی سپلائی چین متاثر ہوگی۔

سعد الکعبی کے مطابق اگر جنگ فوراً ختم بھی ہو جائے تو قطر کو معمول کی ترسیلات کے نظام میں واپس آنے کے لیے ہفتوں سے مہینوں لگ سکتے ہیں۔

سعد الکعبی نے دعویٰ کیا کہ اگر جہاز اور ٹینکر آبنائے ہرمز سے نہ گزر سکے تو دو سے تین ہفتوں میں خام تیل کی قیمت 150 ڈالر فی بیرل تک پہنچ سکتی ہے۔

مشرق وسطیٰ میں کشیدگی کے پیش نظر قطر نے پیر کو ایل این جی(مائع قدرتی گیس) کی پیداوارپہلے ہی روک چکاہے۔ واضح رہے کہ قطر کی ایل این جی پیداوار عالمی سپلائی کا تقریباً 20 فیصد ہے اور ایشیائی و یورپی منڈیوں کی طلب کو متوازن رکھنے میں اہم کردار ادا کرتی ہے۔