پاکستان اور قازقستان کا دوطرفہ تجارت، سرمایہ کاری اور فضائی رابطوں کے فروغ پر اتفاق

وفاقی وزیر برائے بحری امور قیصر احمد شیخ نے قازقستان کے نائب وزیراعظم سیرجان زومانگارین (Serik Zhumangarin) سے ‘تیان شانگ فورم’ کی سائیڈ لائنز پر ایک اہم اور نتیجہ خیز ملاقات کی، جس میں پاکستان اور قازقستان کے درمیان دوطرفہ تجارت، مشترکہ سرمایہ کاری اور فضائی رابطوں کے فروغ پر کامل اتفاق کیا گیا۔

ملاقات کے دوران دونوں ممالک کے مابین اقتصادی اور تجارتی تعلقات کو مزید مستحکم و فعال بنانے کے پختہ عزم کا اعادہ کیا گیا۔ وفاقی وزیر قیصر احمد شیخ نے دوطرفہ بزنس ٹو بزنس (B2B) روابط کو بہتر بنانے اور نجی شعبے کی باہم شمولیت بڑھانے پر خصوصی زور دیا۔ ان کا کہنا تھا کہ پاکستان میں ای کامرس، ویئر ہاؤسنگ، ٹیکسٹائل اور معدنیات کے شعبوں میں سرمایہ کاری کے وسیع اور منافع بخش مواقع موجود ہیں، جبکہ قازقستان کی نسبتاً سستی توانائی پاکستانی ٹیکسٹائل سرمایہ کاروں کے لیے انتہائی پرکشش مواقع فراہم کر سکتی ہے۔

وفاقی وزیر نے اس بات پر بھی زور دیا کہ صدرِ مملکت آصف علی زرداری کے دورہِ قازقستان کے دوران طے پانے والی تمام مفاہمتی یادداشتوں (MoUs) پر فوری عملدرآمد انتہائی ضروری ہے، کیونکہ پاکستان قازقستان کے ساتھ اقتصادی تعاون کو عملی تجارتی اور سرمایہ کاری کی شراکت داری میں تبدیل کرنے کا خواہاں ہے۔ اس موقع پر قازقستان کے نائب وزیراعظم سیرجان زومانگارین نے کہا کہ پاکستان کی 25 کروڑ کی آبادی پر مشتمل ایک بڑی مارکیٹ ان کے ملک کے لیے بہترین تجارتی مواقع رکھتی ہے، اور اسی تناظر میں دونوں ممالک کے مابین معاشی و تجارتی تعاون کو آگے بڑھانے کے لیے پانچ سالہ اسٹریٹجک روڈ میپ تیار کر لیا گیا ہے۔ قیصر احمد شیخ نے امید ظاہر کی کہ موجودہ تجارتی معاہدوں پر مؤثر عملدرآمد اور بینکاری روابط (Banking Channels) میں بہتری سے دوطرفہ تجارت کو ایک نئی جہت ملے گی۔