وفاقی دارالحکومت کو ملک کا پہلا مکمل کیش لیس شہر بنانے کا فیصلہ

وفاقی دارالحکومت اسلام آباد کو پاکستان کا پہلا مکمل کیش لیس شہر بنانے کے لیے 31 دسمبر 2026 کی حتمی ڈیڈ لائن مقرر کر دی گئی ہے، جس کے تحت رواں سال کے اختتام تک شہر کے تمام کاروباری مراکز اور تاجروں کو ڈیجیٹل ادائیگیوں کے نظام میں شامل کرنے کا ہدف رکھا گیا ہے۔ اس اہم پیش رفت کا اعلان وزیر مملکت برائے داخلہ طلال چوہدری کی زیر صدارت منعقدہ اعلیٰ سطحی اجلاس میں کیا گیا، جس میں چیئرمین کیپیٹل ڈویلپمنٹ اتھارٹی (سی ڈی اے) سہیل اشرف، بینکنگ سیکٹر کے نمائندگان اور دیگر اعلیٰ حکام نے شرکت کی۔ وزیر مملکت نے بتایا کہ وزیراعظم اور وفاقی وزیر داخلہ محسن نقوی کی ہدایات پر اسلام آباد کو دنیا کا پہلا کیش لیس دارالحکومت بنانے کے وژن پر تیزی سے عملدرآمد جاری ہے، جبکہ 30 نومبر کے بعد آئی سی ٹی اور سی ڈی اے کے کسی بھی محکمے میں نقد ادائیگی وصول نہیں کی جائے گی۔ انہوں نے مزید کہا کہ دارالحکومت میں اب تک 26 ہزار مرچنٹس ڈیجیٹل نظام سے منسلک ہو چکے ہیں اور 31 دسمبر تک ریڑھی بانوں سے لے کر بڑے شاپنگ مالز تک ہر سطح پر ڈیجیٹل ادائیگیوں کی سہولت فراہم کر دی جائے گی جس سے مالیاتی شفافیت اور ٹیکس مانیٹرنگ میں نمایاں بہتری آئے گی۔