پنجاب میں قانونی اور انتظامی اصلاحات کیلئے ریفارمز کمیٹی تشکیل

پنجاب حکومت نے صوبے میں قانونی، انتظامی اور گورننس کے نظام کو جدید و مؤثر بنانے کے لیے اعلیٰ سطحی ریفارمز کمیٹی تشکیل دے کر باضابطہ نوٹیفکیشن جاری کر دیا ہے۔ جاری کردہ نوٹیفکیشن کے مطابق ایڈووکیٹ جنرل پنجاب بیرسٹر ظفراللہ خان کو اس کمیٹی کا چیئرمین اور کنوینیئر مقرر کیا گیا ہے، جبکہ سینئر ممبر بورڈ آف ریونیو (SMBR)، انسپکٹر جنرل آف پولیس (IG پنجاب) اور سیکرٹری قانون کمیٹی کے اراکین میں شامل ہوں گے۔ یہ اعلیٰ سطحی کمیٹی پنجاب میں گورننس کی بہتری، قانونی سقم دور کرنے اور انتظامی امور میں اصلاحات کے لیے قابلِ عمل تجاویز مرتب کر کے وزیراعلیٰ پنجاب کو پیش کرے گی۔ نوٹیفکیشن کے تحت ایڈووکیٹ جنرل پنجاب کے دفتر میں ایک خصوصی ریفارمز سیل قائم کیا جائے گا، جس کے لاجسٹک اور انتظامی امور چیف سیکرٹری پنجاب کی مشاورت سے طے ہوں گے، جبکہ کمیٹی اپنی تمام حتمی تجاویز چیف سیکرٹری کے توسط سے وزیراعلیٰ کو ارسال کرے گی۔