پنجاب، دفعہ 144 کے نفاذ میں 7 دن کی توسیع

پنجاب حکومت نے صوبے بھر میں دفعہ 144 کے نفاذ میں 7 روز کی توسیع کر دی ہے، جس کے تحت ہر قسم کے احتجاج، جلسے، جلوس، ریلیاں، دھرنے، اجتماعات اور اس نوعیت کی تمام سرگرمیوں پر پابندی برقرار رہے گی۔ نئی توسیع 22 نومبر تک نافذ العمل رہے گی۔
محکمہ داخلہ کے مطابق دفعہ 144 کے تحت چار یا زائد افراد کے عوامی مقامات پر جمع ہونے پر مکمل پابندی ہوگی، جبکہ پورے صوبے میں اسلحہ کی نمائش، لاؤڈ اسپیکر کے استعمال اور اشتعال انگیز، نفرت انگیز یا فرقہ وارانہ مواد کی اشاعت و تقسیم پر بھی سخت پابندی عائد رہے گی۔حکومت پنجاب کا کہنا ہے کہ دفعہ 144 میں توسیع کا فیصلہ امن و امان برقرار رکھنے، عوامی جان و مال کے تحفظ اور موجودہ سکیورٹی خدشات کے باعث کیا گیا ہے۔ حکام کے مطابق عوامی جلوس اور دھرنے دہشت گردوں کے لیے سافٹ ٹارگٹ ثابت ہوسکتے ہیں، جبکہ شرپسند عناصر ایسے اجتماعات کا فائدہ اٹھا کر ریاست مخالف سرگرمیوں کو فروغ دے سکتے ہیں۔تاہم پابندی کا اطلاق شادی کی تقریبات، جنازوں اور تدفین پر نہیں ہوگا، جبکہ سرکاری فرائض سرانجام دینے والے افسران و اہلکار اور عدالتیں بھی اس پابندی سے مستثنیٰ ہوں گی۔ لاؤڈ اسپیکر صرف اذان اور جمعہ کے خطبے کے لیے استعمال کیے جا سکیں گے۔
محکمہ داخلہ نے دفعہ 144 کے نفاذ سے متعلق عوامی آگاہی کے لیے بڑے پیمانے پر مہم چلانے کی ہدایت بھی جاری کر دی ہے