وزیرِ زراعت عاشق کرمانی کی چینی وفد کو مقامی سطح پر زرعی مشینری بنانے کی دعوت

وزیرِ زراعت و لائیو سٹاک پنجاب سید عاشق حسین کرمانی سے چین کے ایک اعلیٰ سطحی وفد نے ملاقات کی، جس میں پنجاب کے زرعی اور لائیو سٹاک کے شعبوں میں جدت، جدید ٹیکنالوجی کی منتقلی اور مشترکہ سرمایہ کاری کے مواقع پر تفصیلی تبادلہ خیال کیا گیا۔ ملاقات کے دوران صوبائی وزیر نے چینی کمپنیوں کو پنجاب میں ہی زرعی مشینری کی مقامی سطح پر مینوفیکچرنگ (لوکل پروڈکشن) شروع کرنے کی باضابطہ پیشکش کی۔ انہوں نے چینی وفد کو پنجاب کی زرعی اہمیت سے آگاہ کرتے ہوئے اہم اعداد و شمار پیش کیے، جن کے مطابق پنجاب ملکی مجموعی پیداوار کی 76 فیصد گندم، 62 فیصد چاول، 54 فیصد کپاس، 98 فیصد مکئی اور 71.3 فیصد گنا پیدا کر کے ملک کے فوڈ سیکیورٹی نیٹ ورک میں ریڑھ کی ہڈی کا کردار ادا کر رہا ہے۔

سید عاشق حسین کرمانی کا کہنا تھا کہ پنجاب میں جدید زرعی مشینری کی طلب اور استعمال کے رجحانات میں مسلسل اضافہ ہو رہا ہے؛ اس وقت چین سے ہائی ہارس پاور ٹریکٹرز، ہارویسٹرز اور دیگر جدید آلات درآمد کیے جا رہے ہیں، لیکن اگر چینی سرمایہ کار بیج، کھاد، بائیوٹیکنالوجی اور کراپ پروٹیکشن کے شعبوں میں یہاں مقامی پلانٹس لگائیں تو ان کے لیے وسیع منافع بخش مواقع موجود ہیں۔ لائیو سٹاک کے حوالے سے گفتگو کرتے ہوئے انہوں نے بتایا کہ پنجاب ملک کی 60 فیصد دودھ اور 65 فیصد گوشت کی پیداوار فراہم کر رہا ہے اور حکومت اس وقت دودھ اور گوشت کی ویلیو ایڈیشن (Value Addition) اور بین الاقوامی برآمدات کے لیے خصوصی اقدامات کر رہی ہے۔ چائنیز وفد نے پنجاب کے زرعی شعبے کی مینوفیکچرنگ صلاحیتوں کو سراہتے ہوئے یہاں جدید خطوط پر سرمایہ کاری کرنے اور باہمی تعاون کو مزید فروغ دینے میں گہری دلچسپی کا اظہار کیا۔