حکومت نے بانی پی ٹی آئی سے ملاقات کیلئے اپوزیشن کی تجویز مسترد کر دی

اسلام آباد میں حکومت نے بانی پی ٹی آئی عمران خان سے ملاقات کے حوالے سے اپوزیشن کی تجویز کو مسترد کر دیا ہے۔

سینیٹ اجلاس میں وزیراعظم کے مشیر رانا ثنا اللہ نے مؤقف اختیار کیا کہ اس مقصد کے لیے کسی کمیٹی کی تشکیل کی کوئی گنجائش موجود نہیں اور قانون بھی اس بات کی اجازت نہیں دیتا کہ ایسی ملاقاتوں کو سیاسی مقاصد کے لیے استعمال کیا جائے۔

انہوں نے کہا کہ بشریٰ بی بی اور بانی پی ٹی آئی کو بہترین طبی سہولیات فراہم کی جا رہی ہیں، اگر اپوزیشن کو کسی قواعد کی خلاف ورزی پر اعتراض ہے تو وہ عدالت سے رجوع کر سکتی ہے۔

دوسری جانب قومی اسمبلی میں وزیر پارلیمانی امور طارق فضل چوہدری نے کہا کہ بانی پی ٹی آئی سے ملاقات کو کوئی بڑا سیاسی مسئلہ نہیں بنایا جا سکتا اور حکومت ان کی صحت سے متعلق معاملات پر توجہ دے رہی ہے۔

انہوں نے مزید کہا کہ رات کے وقت اسپتال منتقل کرنے پر اعتراض درست نہیں کیونکہ طبی ایمرجنسی کسی وقت کی پابند نہیں ہوتی۔