پی ٹی آئی کا 27 ویں آئینی ترمیم کے خلاف بھرپور آواز اٹھانے کا فیصلہ

رہنما پاکستان تحریک انصاف اور سابق سپیکر قومی اسمبلی اسد قیصر نے کہا ہے کہ اسلام آباد کچہری کے باہر خودکش حملہ ہوا، حکومت کی توجہ مخالفین پر کیسز بنانے پر مرکوز ہے، حکومت اپنے بنیادی کام سے غافل ہے، کوئی حکومتی عہدیدار اسلام آباد جوڈیشل کمپلیکس نہیں آیا۔

ان کا کہنا تھا کہ اسلام آباد واقعہ کے شہداء اور زخمیوں کیلئے امدادی پیکیج کا اعلان کیا جائے، حکومت سکیورٹی سے متعلق ایسا لائحہ عمل بنائے کہ وکلاء اور اسلام آباد کے شہری اپنے کام آگے بڑھا سکیں، ہم اسلام آباد میں ہونے والے دہشت گردی کے واقعہ کی بھرپورمذمت کرتے ہیں۔

انہوں نے کہا کہ 26 ویں اور 27 ویں آئینی ترمیم سے عدالتوں کو مکمل طور پر مفلوج کر دیا گیا، ہم نے فیصلہ کیا ہے 27 ویں ترمیم کے خلاف بھرپور آواز اٹھائیں گے، جمعہ کو ہمارا آئینی وقانونی احتجاج ہوگا ،سمجھتا ہوں سب شرکت کریں گے۔

اسد قیصر کا کہنا تھا کہ ہمیں پیپلزپارٹی سے بڑی توقعات تھیں، ہمارا خیال تھا کہ پیپلزپارٹی بھٹو کے آئین کیلئے سیاست قربان کر کے عوام کے ساتھ کھڑی ہوگی، ہمیں نوازشریف سے بھی توقع تھی، انہوں نے اعلان کیا تھا ووٹ کو عزت دو، نوازشریف نے ووٹ کو حق دو کا نعرہ لگایا، لیکن وہ بھی سمجھوتہ کر گئے۔