چیئرمین پی ٹی آئی بیرسٹر گوہر کی والدہ انتقال کر گئیں

پاکستان تحریک انصاف (پی ٹی آئی) کے چیئرمین بیرسٹر گوہر خان کی والدہ محترمہ قضائے الٰہی سے انتقال کر گئی ہیں۔

اس دکھد خبر کی تصدیق بیرسٹر گوہر خان نے سماجی رابطے کی ویب سائٹ ایکس (سابقہ ٹوئٹر) پر اپنے ایک جذباتی پیغام کے ذریعے کی۔ انہوں نے لکھا کہ “انتہائی رنج و غم کے ساتھ اطلاع دی جاتی ہے کہ ہماری نہایت محترم، شفیق اور پیاری والدہ انتقال فرما گئی ہیں، ان کے جانے سے خاندان ایک عظیم نعمت سے محروم ہو گیا ہے۔”

بیرسٹر گوہر نے غمزدہ خاندان اور خود کے لیے صبر کی اپیل کرتے ہوئے کہا کہ “آپ تمام احباب سے دعاؤں کی خاص التجا ہے کہ اللہ تعالیٰ ہماری والدہ ماجدہ کو جنت الفردوس میں اعلیٰ مقام اور اپنے جوارِ رحمت میں جگہ عطا فرمائے۔” انہوں نے بتایا کہ مرحومہ کی نمازِ جنازہ آج بروز ہفتہ شام 4:00 بجے ان کے آبائی گاؤں ڈگر (ضلع بونیر) میں ادا کی جائے گی۔