شائقین کرکٹ سے معذرت، ملک و قوم کا مفاد سب سے پہلے دیکھنا ہوتا ہے، محسن نقوی

لاہور: چیئرمین پاکستان کرکٹ بورڈ (پی سی بی) محسن نقوی نے پی ایس ایل 11 کی تمام ٹیموں کے اعزاز میں ایک پروقار تقریب کا اہتمام کیا، جس میں ملکی و غیر ملکی کھلاڑیوں، فرنچائز مالکان اور اعلیٰ سرکاری شخصیات نے شرکت کی۔ تقریب کی خاص بات پی ایس ایل 11 کی چمکتی دمکتی ٹرافی کی رونمائی اور ایونٹ کے باضابطہ ترانے کا لانچ تھا۔

اس موقع پر خطاب کرتے ہوئے محسن نقوی نے ایونٹ کے شیڈول میں تبدیلی پر شائقینِ کرکٹ سے دل کی گہرائیوں سے معذرت کی۔ انہوں نے واضح کیا کہ خطے کی موجودہ صورتحال اور وسیع تر قومی مفاد کو مدنظر رکھتے ہوئے پی ایس ایل 11 کو محدود کرنے کا مشکل فیصلہ کیا گیا ہے۔ ان کا کہنا تھا کہ “ملک و قوم کا مفاد سب سے پہلے ہوتا ہے، مجھے یقین ہے کہ آج کی یہ قربانی کل ہمارے لیے آسانیاں پیدا کرے گی۔”

چیئرمین پی سی بی نے پی ایس ایل کو ایک ‘ٹاپ انٹرنیشنل برانڈ’ قرار دیتے ہوئے اسے مزید بلندیوں تک لے جانے کے عزم کا اعادہ کیا۔ تقریب میں وفاقی وزراء محمد اورنگزیب، عطا اللہ تارڑ، سینئر صوبائی وزیر مریم اورنگزیب، اسپیکر پنجاب اسمبلی ملک محمد احمد خان اور دیگر اہم شخصیات نے شرکت کر کے کھلاڑیوں کی حوصلہ افزائی کی۔ قومی اور بین الاقوامی کرکٹرز کی موجودگی نے تقریب کو چار چاند لگا دیے، جو ایونٹ کے باضابطہ آغاز کا پیش خیمہ ہے۔