واشنگٹن میں نیتن یاہو کیخلاف احتجاج، اسرائیلی وزیراعظم کی گرفتاری کا مطالبہ

اسرائیلی وزیراعظم بنیامین نیتن یاہو کے دورۂ امریکہ کے موقع پر واشنگٹن ڈی سی میں سینکڑوں افراد نے شدید بارش کے باوجود زبردست احتجاجی مظاہرہ کیا اور امریکی حکومت سے بین الاقوامی فوجداری عدالت (ICC) کے جاری کردہ وارنٹِ گرفتاری پر عمل درآمد کا مطالبہ کیا۔ مظاہرین فلسطینی پرچم اور بینرز اٹھائے وائٹ ہاؤس کی طرف مارچ کرتے رہے جبکہ ‘نسل کشی بند کرو’ کے نعرے لگاتے رہے۔ اس دوران مظاہرین کا ایک گروپ جارج ٹاؤن میں واقع فور سیزنز ہوٹل کے اندر داخل ہو گیا جہاں نیتن یاہو رات کے کھانے میں شریک تھے، تاہم سیکیورٹی اہلکاروں نے بروقت کارروائی کرتے ہوئے مظاہرین کو باہر نکال دیا۔ سوشل میڈیا پر وائرل ہونے والی ویڈیوز میں مظاہرین کو سخت نعرے بازی کرتے دیکھا جا سکتا ہے۔