صدر آصف علی زرداری دو روزہ دورے پر لاہور پہنچ گئے

صدرِ مملکت آصف علی زرداری اپنے دو روزہ سرکاری و سیاسی دورے پر لاہور پہنچ گئے ہیں، جہاں لاہور آمد پر قائم مقام گورنر پنجاب ملک محمد احمد خان نے ان کا پرجوش استقبال کیا۔

ترجمان کے مطابق صدرِ مملکت اپنے اس دو روزہ قیام کے دوران بلاول ہاؤس لاہور میں رہیں گے، جہاں وہ مختلف اہم سیاسی و نجی ملاقاتوں میں مصروف رہیں گے۔ اس دورے کا بنیادی مقصد پنجاب میں سیاسی صورتِ حال کا جائزہ لینا اور اہم رہنماؤں سے مشاورت کرنا ہے۔

ذرائع کے مطابق صدرِ مملکت آصف علی زرداری اپنے قیام کے دوران پاکستان پیپلز پارٹی (پی پی پی) کی تنظیم سازی، پارٹی کے اندرونی امور اور تنظیمی ڈھانچے کا تفصیلی جائزہ لیں گے۔ اس کے علاوہ وہ پیپلز پارٹی کے مقامی اور صوبائی رہنماؤں سے ملاقاتیں کر کے پارٹی کو متحرک کرنے اور مستقبل کی سیاسی حکمتِ عملی ترتیب دینے سے متعلق اہم ہدایات بھی جاری کریں گے۔