پیپلز پارٹی کا آزاد کشمیر الیکشن، نئے صوبوں کا معاملہ پارلیمان میں اٹھانے کا فیصلہ

پاکستان پیپلز پارٹی نے آزاد کشمیر کے انتخابات اور نئے صوبوں کے قیام سے متعلق اہم قومی امور پر اپنا مؤقف پارلیمان کے ایوان میں طاقتور انداز سے اٹھانے کا فیصلہ کیا ہے۔ ذرائع کے مطابق چیئرمین بلاول بھٹو زرداری آئندہ دو روز میں قومی اسمبلی میں اہم خطاب کر سکتے ہیں، جس میں وہ آزاد کشمیر کے حالیہ انتخابات سے متعلق پارٹی کے تحفظات اور مبینہ دھاندلی کے الزامات پر تفصیلی گفتگو کریں گے۔ اس کے علاوہ بلاول بھٹو وفاقی حکومت سے ہونے والے مذاکرات اور آئندہ کی سیاسی حکمتِ عملی پر ایوان کو اعتماد میں لیں گے۔ پیپلز پارٹی کے پارلیمنٹیرینز نئے صوبوں کی تشکیل سے متعلق بھی پارٹی کا باضابطہ نکتہ نظر اسمبلی کے سامنے رکھیں گے۔