پاکستان خطے میں پائیدار امن کیلئے اپنی کوششیں جاری رکھے گا: وزیراعظم

وزیراعظم شہباز شریف نے آسٹریلوی وزیراعظم انتھونی البانیز کی جانب سے مشرقِ وسطیٰ میں امن کے لیے پاکستان کی سفارتی کوششوں کے اعتراف پر ان کا شکریہ ادا کیا ہے۔ وزیراعظم نے اپنے بیان میں اس عزم کا اعادہ کیا ہے کہ پاکستان خطے میں پائیدار امن اور استحکام کے قیام کے لیے اپنی مخلصانہ کوششیں جاری رکھے گا۔ اس سے قبل، آسٹریلوی وزیراعظم انتھونی البانیز اور وزیر خارجہ پینی وونگ نے امریکہ، اسرائیل اور ایران کے درمیان دو ہفتوں کی جنگ بندی کا خیرمقدم کرتے ہوئے اسے طویل مدتی تنازع کے خاتمے کی جانب ایک اہم سنگِ میل قرار دیا تھا۔

آسٹریلوی حکومت کی جانب سے جاری کردہ بیان میں کہا گیا ہے کہ وہ ایک عرصے سے خطے میں کشیدگی کم کرنے کا مطالبہ کر رہے تھے، کیونکہ ایران کی جانب سے آبنائے ہرمز کی عملی بندش اور توانائی کی تنصیبات پر حملوں نے عالمی منڈیوں کو بری طرح متاثر کیا تھا، جس کے نتیجے میں عالمی سطح پر تیل اور گیس کی قیمتوں میں غیر معمولی اضافہ ہوا۔ آسٹریلیا نے اس نازک صورتحال میں کشیدگی کم کرنے کے لیے پاکستان، مصر، ترکیہ اور سعودی عرب کے سفارتی کردار کو خصوصی طور پر سراہا اور امید ظاہر کی کہ یہ جنگ بندی مذاکرات کے ذریعے کسی مستقل حل کی بنیاد بنے گی۔