ناکہ بندی سے ایرانی عوام کو بھوکا رکھنے کی امریکی دھمکی جنگی جرائم کا اعتراف ہے: اسماعیل بقائی

ایرانی وزارتِ خارجہ کے ترجمان اسماعیل بقائی نے سخت ردعمل دیتے ہوئے کہا ہے کہ امریکا نے بحری ناکہ بندی کے ذریعے عام ایرانی عوام کو بھوکا رکھنے کی دھمکیاں دے کر جنگی جرائم کے ارتکاب کا کھل کر اعتراف کر لیا ہے۔

سماجی رابطے کی ویب سائٹ پر جاری اپنے ایک بیان میں ایرانی وزارتِ خارجہ کے ترجمان نے امریکی وزیرِ خارجہ مارکو روبیو کے حالیہ بیان کو شدید تنقید کا نشانہ بناتے ہوئے اسے ایرانی عوام کو جان بوجھ کر بھوک سے دوچار کرنے کی کھلی دھمکی قرار دیا۔ واضح رہے کہ امریکی وزیرِ خارجہ نے اپنے ایک بیان میں کہا تھا کہ ایرانیوں کو کھانا تو کھانا ہی ہوگا۔

اسماعیل بقائی نے اس عزم کا اظہار کیا کہ امریکا گزشتہ کئی دہائیوں سے ظالمانہ پابندیوں، دھمکیوں، ریاستی دہشت گردی اور فوجی جارحیت کے ہتھکنڈوں کے ذریعے ایران کو دباؤ میں لانے کی ناکام کوششیں کر رہا ہے، اور واشنگٹن کی جانب سے عائد کی جانے والی نئی پابندیاں بھی اسی پرانی اور ناکام پالیسی کا تسلسل ہیں۔

ایرانی ترجمان نے امریکی حکمت عملی کو تاریخی غلطیوں کی تکرار قرار دیتے ہوئے کہا کہ واشنگٹن کی حکومت ماضی کی ناکامیوں سے کوئی سبق سیکھنے کے لیے تیار نہیں ہے، بلکہ وہ اپنی دباؤ کی پالیسیوں کو محض نئے ناموں اور عنوانات کے ساتھ دوبارہ دہرا رہی ہے۔