کراچی: 3 مزدور گٹر کی صفائی کے دوران دم توڑ گئے

کراچی کے علاقے لیاری سیکٹر 36 میں ایک افسوسناک واقعہ پیش آیا ہے جہاں گٹر کی صفائی کے دوران زہریلی گیس کے باعث دم گھٹنے سے 3 مزدور جان کی بازی ہار گئے۔

لیاری میں پیش آنے والے اس حادثے نے ایک بار پھر سیوریج سسٹم کی صفائی کے دوران حفاظتی انتظامات کے فقدان پر سوالات کھڑے کر دیے ہیں۔ ماضی میں بھی کراچی کے مختلف علاقوں میں صفائی کے دوران مناسب حفاظتی آلات نہ ہونے کی وجہ سے کئی مزدور اپنی جانیں گنوا چکے ہیں۔

وزیراعلیٰ سندھ مراد علی شاہ نے مزدوروں کی ہلاکت پر گہرے دکھ اور افسوس کا اظہار کیا ہے۔ انہوں نے واقعے کا نوٹس لیتے ہوئے متعلقہ حکام سے فوری رپورٹ طلب کر لی ہے تاکہ غفلت کے ذمہ داروں کا تعین کیا جا سکے۔