وزیراعلیٰ پنجاب مریم نواز شریف کی زیر صدارت اجلاس، ہیلتھ سیکٹر کا جائیزہ لیا گیا

وزیراعلیٰ پنجاب مریم نواز شریف کی زیر صدارت صوبے میں جاری صحت کے منصوبوں کا ایک اہم جائزہ اجلاس منعقد ہوا، جس میں سیکرٹری ہیلتھ اینڈ پاپولیشن نادیہ ثاقب نے حکومتی اقدامات اور ان کے ثمرات پر تفصیلی بریفنگ دی۔

بریفنگ کے مطابق پنجاب میں ’کلینک آن ویلز‘ اور ’فیلڈ ہسپتال‘ کے منصوبوں نے عوامی سطح پر بڑی کامیابی حاصل کی ہے۔ ’کلینک آن ویلز‘ کے ذریعے اب تک ایک کروڑ 82 لاکھ مریضوں کا علاج کیا جا چکا ہے، جبکہ فیلڈ ہسپتالوں سے 28 لاکھ سے زائد شہری مستفید ہوئے ہیں۔ اجلاس میں بتایا گیا کہ ذیابیطس، ہیپاٹائٹس اور تپ دق (ٹی بی) کے ہزاروں مریضوں کو گھر بیٹھے دو دو ماہ کی ادویات اور انسولین فراہم کی جا رہی ہے، جو کہ ایک انقلابی اقدام ہے۔

بنیادی اور دیہی مراکز صحت (BHUs & RHCs) کی ری ویمپنگ کے حوالے سے بتایا گیا کہ پہلے اور دوسرے فیز میں سینکڑوں مراکز کی بحالی مکمل ہو چکی ہے جبکہ فیز تھری کے تحت 895 مراکز پر کام تیزی سے جاری ہے۔ اس کے علاوہ پنجاب بھر میں 6 کروڑ 30 لاکھ افراد کی رجسٹریشن مکمل کر لی گئی ہے تاکہ صحت کی سہولیات کی بہتر منصوبہ بندی کی جا سکے۔

وزیراعلیٰ مریم نواز شریف نے اجلاس کے دوران ضلعی ہسپتالوں میں ’سٹروک مینجمنٹ سنٹرز‘ (فالج کے علاج کے مراکز) کے قیام کی ہدایت کی اور حکم دیا کہ مراکزِ صحت کی ری ویمپنگ کا کام رواں سال ہی مکمل کیا جائے۔ انہوں نے نرسنگ کے شعبے کی اہمیت کے پیشِ نظر سرکاری ہسپتالوں میں نرسنگ ڈگری کی نشستیں بڑھانے کے لیے فوری اقدامات کرنے کا بھی حکم دیا۔