وزیراعظم اور ترک صدر کا رابطہ، موجودہ بحران کے حل کیلئے تعمیری کردار ادا کرنے کا عزم

وزیراعظم محمد شہباز شریف اور ترکیہ کے صدر رجب طیب اردگان کے درمیان ٹیلی فون پر رابطہ ہوا ہے جس میں مشرقِ وسطیٰ میں تیزی سے بڑھتے ہوئے بحران اور علاقائی سلامتی کی صورتحال پر تفصیلی تبادلہ خیال کیا گیا۔ دونوں رہنماؤں نے خطے میں جاری کشیدگی پر گہری تشویش کا اظہار کرتے ہوئے اس بات پر اتفاق کیا کہ مزید بگاڑ سے بچنے کے لیے تمام فریقین کو تحمل اور بردباری کا مظاہرہ کرنا چاہیے۔

وزیراعظم شہباز شریف نے صدر اردگان کو خلیجی ممالک کی قیادت کے ساتھ اپنے حالیہ رابطوں سے آگاہ کیا اور اس عزم کا اعادہ کیا کہ پاکستان بحران کے حل کے لیے تعمیری کردار ادا کرنے کے لیے تیار ہے۔ گفتگو کے دوران وزیراعظم نے ترک صدر کو افغانستان کی حالیہ صورتحال اور وہاں ہونے والی پیشرفت سے بھی باخبر کیا۔ دونوں عالمی رہنماؤں نے خطے میں پائیدار امن و استحکام کے لیے اپنی مشترکہ کوششیں جاری رکھنے پر اتفاق کیا ہے۔