وزیراعظم کی زیر صدارت اجلاس: کفایت شعاری اقدامات کی نگرانی کے لیے خصوصی کمیٹی قائم

اسلام آباد: وزیراعظم محمد شہباز شریف کی زیر صدارت آج وزیراعظم ہاؤس میں اجلاس ہوا، جس میں موجودہ علاقائی اور عالمی صورتحال کے پیش نظر کفایت شعاری اور توانائی کی بچت کے اقدامات پر جائزہ لیا گیا۔

اجلاس میں فیصلہ کیا گیا کہ ہفتہ وار اضافی چھٹی جمعہ کے روز ہوگی۔ وزیراعظم نے ہدایت کی کہ تمام وفاقی وزارتیں اور ڈویژنز سادگی، کفایت شعاری اور توانائی کی بچت کے اقدامات کو بھرپور طریقے سے نافذ کریں۔

نائب وزیراعظم و وزیر خارجہ اسحاق ڈار کی قیادت میں ایک خصوصی کمیٹی قائم کی گئی ہے جو روزانہ کی بنیاد پر اقدامات کا جائزہ لے کر رپورٹ پیش کرے گی۔ وزیراعظم نے ہدایت دی کہ کفایت شعاری کے اقدامات کا تھرڈ پارٹی آڈٹ کروایا جائے تاکہ ان کے اثرات کا جائزہ لیا جا سکے۔

تمام وزارتیں اور ادارے بند کی گئی گاڑیوں کی تصاویر کابینہ ڈویژن کو بھیجیں گی اور ورک فرام ہوم کے حوالے سے اپنی رپورٹ وزیراعظم آفس کو ارسال کریں گی۔ روزانہ اور ہفتہ وار رپورٹس کمیٹی کو جمع کروائی جائیں گی۔

اجلاس میں نائب وزیراعظم و وزیر خارجہ اسحاق ڈار، وفاقی وزیر موسمیاتی تبدیلی مصدق ملک، وفاقی وزیر خزانہ و محصولات محمد اورنگزیب، وفاقی وزیر اقتصادی امور احد خان چیمہ، وفاقی وزیر اطلاعات و نشریات عطاء اللہ تارڑ، وزیر مملکت برائے خزانہ و ریلوے بلال اظہر کیانی اور متعلقہ اعلیٰ سرکاری افسران نے شرکت کی۔