وزیراعظم کا فیلڈ مارشل  سمیت سروسز چیفس سے فون پر رابطہ، عیدکی مبارکباد، افواج کو خراجِ تحسین

اسلام آباد: شہباز شریف نے عیدالاضحیٰ کے پُرمسرت موقع پر ملک کی اعلیٰ عسکری قیادت سے ٹیلیفونک رابطے کرتے ہوئے عید کی مبارکباد دی۔
وزیراعظم نے چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر، چیف آف ائیر اسٹاف ائیر چیف مارشل ظہیر احمد بابر اور چیف آف نیول اسٹاف ایڈمرل نوید اشرف کو ٹیلیفون پر عید کی مبارکباد پیش کی۔
وزیراعظم نے مسلح افواج کی پیشہ ورانہ صلاحیتوں، قومی سلامتی کے لیے خدمات اور قربانیوں کو خراجِ تحسین پیش کرتے ہوئے کہا کہ قوم کو اپنی افواج کی غیر متزلزل وابستگی اور قربانیوں پر فخر ہے۔
انہوں نے ملک کی سلامتی، ترقی اور خوشحالی کے لیے دعا کی اور عید کے موقع پر بھی وطن کے دفاع کے لیے فرائض انجام دینے والے افسران اور جوانوں کو خصوصی خراجِ عقیدت پیش کیا۔
عسکری قیادت نے وزیراعظم کی جانب سے عید کی مبارکباد کا شکریہ ادا کرتے ہوئے ملک و قوم کے لیے نیک خواہشات کا اظہار کیا اور اس عزم کا اعادہ کیا کہ افواجِ پاکستان ہر وقت وطن کے دفاع کے لیے تیار ہیں۔