پی آئی اے کا لندن کے فضائی آپریشن میں توسیع کا فیصلہ، 27 اکتوبر سے روزانہ پروازیں چلیں گی

اسلام آباد: پاکستان انٹرنیشنل ایئرلائنز (پی آئی اے) نے مسافروں کی بڑھتی ہوئی مانگ اور اعتماد کے پیشِ نظر برطانیہ کے دارالحکومت لندن کے لیے اپنے فضائی آپریشن میں توسیع کرنے کا بڑا فیصلہ کیا ہے۔ترجمان پی آئی اے کی جانب سے جاری کردہ اعلان کے مطابق قومی ایئرلائن 27 اکتوبر سے پاکستان اور لندن کے مابین ہفتہ وار پروازوں کی تعداد 4 سے بڑھا کر 7 کر دے گی، جس کے بعد لندن کے لیے روزانہ کی بنیاد پر پروازیں آپریٹ کی جائیں گی۔نئے شیڈول کے تحت ہفتہ وار 5 پروازیں اسلام آباد اور 2 پروازیں لاہور سے لندن (ہیتھرو) کے لیے روانہ ہوں گی۔ پی آئی اے ترجمان کا کہنا ہے کہ پروازوں کی تعداد میں یہ اضافہ مسافروں کی جانب سے مسلسل دکھائے جانے والے اعتماد اور لندن روٹ پر بڑھتی ہوئی مانگ کا واضح مظہر ہے۔