پٹرول سستا، ڈیزل مہنگا: حکومت نے نئی قیمتوں کا اعلان کردیا

حکومت نے ملک میں پٹرولیم مصنوعات کی نئی قیمتوں کا باضابطہ اعلان کر دیا ہے، جس کے تحت پٹرول کی قیمت میں معمولی کمی جبکہ ہائی سپیڈ ڈیزل کی قیمت میں اضافہ کیا گیا ہے۔ پٹرولیم ڈویژن کے جاری کردہ نوٹیفکیشن کے مطابق پٹرول کی قیمت میں 1 روپے 70 پیسے فی لٹر کمی کے بعد نئی قیمت 325 روپے 92 پیسے فی لٹر مقرر کر دی گئی ہے۔ دوسری جانب ہائی سپیڈ ڈیزل کی قیمت میں 1 روپے 39 پیسے فی لٹر اضافہ کیا گیا ہے جس کے بعد ڈیزل کی نئی قیمت 382 روپے 25 پیسے فی لٹر ہو گئی ہے۔ نئی قیمتوں کا اطلاق رات 12 بجے کے بعد سے ہوگا۔ معاشی ماہرین کا کہنا ہے کہ ڈیزل کی قیمت بڑھنے سے ٹرانسپورٹ کے کرایوں اور اشیائے ضروریہ کی قیمتوں پر اضافی دباؤ آنے کا امکان ہے۔