پشاور میں شام کی عدالتوں کا باضابطہ آغاز، فوری انصاف کی فراہمی کے لیے سماعتیں شروع

پشاور: عدالتی تاریخ میں اہم پیش رفت کے طور پر پشاور میں شام کی عدالتوں کا باضابطہ افتتاح کر دیا گیا، جس کے بعد ان عدالتوں میں مقدمات کی سماعت بھی شروع ہو گئی ہے۔ افتتاح کی تقریب چیف جسٹس پشاور ہائی کورٹ جسٹس ایس ایم عتیق شاہ نے انجام دی۔

تقریب میں رجسٹرار پشاور ہائی کورٹ محمد زیب، پرنسپل سیکریٹری ٹو چیف جسٹس عادل مجید، ڈسٹرکٹ سیشن جج پشاور انعام اللہ وزیر، سینئر سول جج ارشد علی مہمند سمیت دیگر جوڈیشل افسران شریک تھے۔ چیف جسٹس نے عدالت کا معائنہ کیا اور ڈیوٹی ججز کو ہدایت دی کہ سائلین کو فوری انصاف کی فراہمی یقینی بنائی جائے تاکہ زیرالتوا مقدمات جلد نمٹائے جاسکیں۔

رجسٹرار پشاور ہائی کورٹ نے میڈیا سے گفتگو میں بتایا کہ شام کی عدالتوں کا آغاز سب سے پہلے ایبٹ آباد میں کیا گیا تھا، جبکہ اب پشاور میں سیکنڈ شفٹ کی دو عدالتیں فعال کر دی گئی ہیں۔ ان کا کہنا تھا کہ شام کے اوقات کی عدالتوں کا بنیادی مقصد تیز رفتار انصاف فراہم کرنا ہے، اور وہ افراد جو دن کے وقت مصروف رہتے ہیں، شام میں پیش ہوسکیں گے۔

انہوں نے مزید کہا کہ شام کی عدالتوں کے قیام سے مقدمات نمٹانے کی رفتار بڑھے گی، جبکہ کوہاٹ اور مردان سے بھی اس نظام کے قیام کی درخواستیں موصول ہو چکی ہیں۔
رجسٹرار کے مطابق وکلا کے تحفظات دور کیے جائیں گے اور بار اور بینچ کے درمیان مثالی ورکنگ ریلیشن برقرار رہے گا۔