پاک افغان بارڈر فوری کھولا جائے، معدنیات کی غیرقانونی نکاسی روکنے کیلئے پالیسی بنانے کا مطالبہ،امن جرگہ کا اعلامیہ جاری

پشاور: خیبر پختونخوا اسمبلی امن جرگہ کے اعلامیے میں مطالبہ کیا گیا ہے کہ پاک افغان بارڈر کو تجارت کے لیے فوری طور پر کھولا جائے اور معدنیات کی غیرقانونی نکاسی کے خاتمے کے لیے ایک مربوط پالیسی بنائی جائے۔

اعلامیے میں صوبے میں جاری دہشت گردی کی شدید مذمت کی گئی اور کہا گیا کہ دہشت گردی کے خاتمے کے لیے صوبائی اسمبلی کو اعتماد میں لے کر قانون کے دائرے میں موجود وسائل بروئے کار لائے جائیں۔

مزید کہا گیا کہ امن و امان کے حوالے سے اسمبلی کی متفقہ قراردادوں پر فوری عمل درآمد کیا جائے جبکہ پولیس اور سی ٹی ڈی داخلی سلامتی کی قیادت کریں گی۔ اعلامیے میں یہ بھی کہا گیا کہ پولیس ضرورت کے مطابق دیگر اداروں سے آئینی طور پر معاونت طلب کر سکتی ہے۔

حکومت سے مطالبہ کیا گیا کہ صوبے میں امن و امان کی مخدوش صورتحال کے پیش نظر پولیس اور سی ٹی ڈی کو خصوصی مالی معاونت فراہم کی جائے۔

اعلامیے میں بھتہ خوری اور غیر قانونی محصولات کے خاتمے، شورش زدہ علاقوں میں معدنیات کی غیرقانونی نکاسی روکنے، اور مقامی حکومتوں کے استحکام کے لیے آئینی ترمیم کی تجویز بھی دی گئی۔

مزید یہ کہ وفاقی حکومت سے کہا گیا کہ پاک افغان خارجہ پالیسی کے معاملے میں صوبائی حکومت سے مشاورت کی جائے اور پاک افغان مسائل کے حل کے لیے سفارتکاری کو ترجیح دی جائے۔