پی سی بی اور سعودی کرکٹ فیڈریشن میں تاریخی معاہدہ، جدہ میں عالمی معیار کا کرکٹ اسٹیڈیم تعمیر کیا جائے گا

پاکستان کرکٹ بورڈ (پی سی بی) اور سعودی کرکٹ فیڈریشن کے درمیان ایک تاریخی اسٹریٹجک معاہدہ طے پا گیا ہے، جس کے تحت جدہ میں بین الاقوامی معیار کا کرکٹ اسٹیڈیم تعمیر کیا جائے گا۔ اس مفاہمت کی یادداشت (MoU) پر سعودی کرکٹ فیڈریشن کے چیئرمین پرنس سعود بن مشعل اور چیئرمین پی سی بی محسن نقوی نے دستخط کیے۔ معاہدے کے تحت دونوں ممالک مل کر کرکٹ انفراسٹرکچر، پچز اور جدید میڈیا سہولیات تیار کریں گے، جبکہ ٹیکنیکل پروگرامز اور تجربات کا تبادلہ بھی کیا جائے گا۔ جدہ اسٹیڈیم کی تعمیر سے سعودی عرب میں بین الاقوامی کرکٹ میچز اور بڑے ٹورنامنٹس کی میزبانی ممکن ہو سکے گی، جو سعودی ویژن 2030 کے مقاصد کے حصول میں اہم کردار ادا کرے گا۔ اس موقع پر پرنس سعود بن مشعل نے اسے پائیدار سرمایہ کاری قرار دیا جبکہ محسن نقوی نے سعودی عرب کے کرکٹ سفر میں حصہ ڈالنے کو پی سی بی کے لیے اعزاز کہا۔