پاکستان کا ناروے کے سفیر کو سخت احتجاج، سپریم کورٹ میں مبینہ مداخلت پر ڈیمارش جاری

اسلام آباد: وزارتِ خارجہ پاکستان نے ناروے کے سفیر کو سخت احتجاج (ڈیمارش) جاری کرتے ہوئے کہا ہے کہ 11 نومبر 2025 کو ناروے کے سفیر کی سپریم کورٹ میں ایک سماعت میں شرکت پاکستان کے داخلی معاملات میں مداخلت کے مترادف ہے۔

ڈیمارش میں کہا گیا ہے کہ سفیر کی عدالت میں موجودگی ویانا کنونشن 1961 کی صریح خلاف ورزی ہے، جس کے مطابق سفارتی عملے پر لازم ہے کہ وہ میزبان ملک کے قوانین کا احترام کرے اور اس کے اندرونی امور میں مداخلت نہ کرے۔وزارتِ خارجہ نے کہا کہ یہ کوئی پہلا واقعہ نہیں، بلکہ ناروے کی جانب سے ایسے عناصر کی حمایت کا ایک مسلسل رجحان دیکھا گیا ہے جو پاکستان مخالف سرگرمیوں میں ملوث رہے ہیں۔ ڈیمارش کے مطابق کچھ نارویجین این جی اوز بھی ایسے افراد کی پشت پناہی کرتی رہی ہیں جو ریاستِ پاکستان کے خلاف سرگرمیوں میں مشتبہ ہیں۔حکومتِ پاکستان نے واضح کیا کہ ریاست مخالف سرگرمیوں میں ملوث افراد سے متعلق عدالتی مقدمات نہایت حساس داخلی معاملہ ہیں، اور کسی بھی سفارتی نمائندے کی ایسی سرگرمیوں سے وابستگی ناقابلِ قبول ہے۔وزارتِ خارجہ نے کہا کہ پاکستان ناروے کی خودمختاری کا احترام کرتا ہے اور توقع رکھتا ہے کہ ناروے بھی پاکستان کی خودمختاری کا احترام کرے گا۔ مزید زور دیا گیا کہ ناروے کو ویانا کنونشن کے تقاضوں اور سفارتی آداب کی پاسداری کو یقینی بنانا ہوگا۔