ایران میں پاکستانی شہریوں کو وطن واپسی کیلئے رجسٹریشن کرانے کی ہدایت

ایران میں پاکستان کے سفیر مدثر ٹیپو نے ایرانی سرحدوں میں پھنسے پاکستانی شہریوں سے اپیل کی ہے کہ وہ فوری طور پر سفارتخانے میں اپنی رجسٹریشن کرائیں تاکہ وطن واپسی کے منصوبوں میں کسی تاخیر سے بچا جا سکے۔ سفیر نے خاص طور پر قم میں مقیم پاکستانیوں سے کہا کہ وہ فوری تعاون کریں، اور رجسٹریشن کے بعد سفارتخانہ شہریوں کی روانگی کے انتظامات بلا تاخیر مکمل کرے گا۔

دوسری جانب سعودی عرب میں پاکستان کے سفیر احمد فاروق نے اوورسیز پاکستانیوں سے کہا کہ موجودہ علاقائی کشیدگی کے دوران صبر، نظم و ضبط اور ذمہ داری کا مظاہرہ کریں۔ انہوں نے کمیونٹی کو خبردار کیا کہ سوشل میڈیا پر گردش کرنے والی افواہوں پر یقین نہ کریں اور صرف مستند ذرائع سے معلومات حاصل کریں۔