سپر ایٹ مرحلے کا آغاز، پاکستان آج نیوزی لینڈ کے خلاف میدان میں

انٹرنیشنل کرکٹ کونسل کے ٹی 20 ورلڈ کپ میں سپر ایٹ مرحلہ آج سے شروع ہوگا۔ میگا ایونٹ کے دوسرے مرحلے کا پہلا میچ پاکستان اور نیوزی لینڈ کے درمیان پاکستانی وقت کے مطابق شام ساڑھے چھ بجے شیڈول ہے۔

نیوزی لینڈ کی ٹیم نے میچ کی تیاری کے لیے دن کے اوقات میں بھرپور پریکٹس کی۔ پاکستانی اسپنر عثمان طارق کی بولنگ کے لیے نیوزی لینڈ کے کوچز نے بیٹرز کو پاکستانی بولر کے ایکشن میں گیندیں کرائی تاکہ بیٹنگ کا بہتر انداز سیکھا جا سکے۔

پاکستان کرکٹ ٹیم کا فلڈ لائٹس میں شیڈول شدہ ٹریننگ سیشن کولمبو میں بارش کی وجہ سے منسوخ کرنا پڑا۔ ہیڈ کوچ مائیک ہیسن نے پریس کانفرنس میں کہا کہ ہم چھ ماہ سے اس میچ کی تیاری کر رہے ہیں، کھلاڑی پر اعتماد ہے اور کنڈیشنز سے بھرپور فائدہ اٹھائیں گے۔

پاکستان سپر ایٹ مرحلے میں اگلے دو میچز انگلینڈ اور سری لنکا کے خلاف 24 اور 28 فروری کو کھیلیں گے۔ میچز جیو سوپر اور ڈیجیٹل پلیٹ فارم مائیکو پر براہ راست نشر کیے جائیں گے۔