پاکستان کا یوکرین میں فوری جنگ بندی اور منظم مذاکرات کی بحالی پر زور، “تنازع کا کوئی فوجی حل ممکن نہیں”، سفیر عاصم افتخار

پاکستان نے یوکرین تنازع کے پانچویں سال میں داخل ہونے پر گہری تشویش کا اظہار کرتے ہوئے عالمی برادری پر زور دیا ہے کہ وہ فوری جنگ بندی اور بامقصد مذاکرات کی بحالی کے لیے اپنا کردار ادا کرے۔ اقوامِ متحدہ کی سلامتی کونسل میں یوکرین کی صورتحال پر بریفنگ دیتے ہوئے پاکستان کے مستقل مندوب، سفیر عاصم افتخار احمد نے واضح کیا کہ پائیدار امن صرف اقوامِ متحدہ کے منشور اور مکالمے کے ذریعے ہی ممکن ہے، فوجی طاقت اس کا حل نہیں ہے۔

سفیر عاصم افتخار نے انسانی بحران کے پہلو کو اجاگر کرتے ہوئے کہا کہ عام شہری اس جنگ کا سب سے بڑا نشانہ بن رہے ہیں، جس کے نتیجے میں بڑے پیمانے پر جانی نقصان اور نقل مکانی ہوئی ہے۔ انہوں نے یاد دلایا کہ پاکستان نے ہمیشہ سفارتی عمل کی حمایت کی ہے، چاہے وہ 2022 کے استنبول مذاکرات ہوں یا گزشتہ سال منظور ہونے والی سلامتی کونسل کی قرارداد 2774۔

پاکستانی مندوب نے اس بات پر افسوس کا اظہار کیا کہ مشرقِ وسطیٰ کے حالیہ بحران نے یوکرین کے مذاکراتی عمل کو متاثر کیا ہے، تاہم انہوں نے امید ظاہر کی کہ مذاکرات کا اگلا دور جلد منعقد ہوگا۔ انہوں نے تمام فریقین پر زور دیا کہ وہ سیاسی عزم کا مظاہرہ کریں اور ایک ایسا متفقہ حل تلاش کریں جس میں تمام فریقوں کے جائز سیکیورٹی مفادات کا احترام کیا گیا ہو۔ پاکستان نے ایک بار پھر عالمی سطح پر کشیدگی میں کمی اور بین الاقوامی قانون کی بالادستی کے لیے اپنی غیر متزلزل حمایت کا اعادہ کیا ہے