مشرق وسطیٰ میں کشیدگی فوری ختم کی جائے، پاکستان کا سلامتی کونسل میں مطالبہ

پاکستان نے اقوام متحدہ کی سلامتی کونسل میں مشرق وسطیٰ میں کشیدگی کے فوری خاتمے کا مطالبہ کیا ہے۔

اقوام متحدہ میں پاکستان کے مستقل مندوب عاصم افتخار نے ایران سے متعلق سلامتی کونسل کے اجلاس سے خطاب کرتے ہوئے کہا کہ خطے میں بڑھتی ہوئی کشیدگی فوری ختم ہونی چاہیے اور تمام فریقین انتہائی تحمل کا مظاہرہ کریں۔ انہوں نے مزید کشیدگی سے گریز کرنے پر زور دیا۔

ان کا کہنا تھا کہ فریقین مستقل جنگ بندی قائم کریں اور مذاکرات کا عمل دوبارہ شروع کریں۔ عاصم افتخار نے ایران کے جوہری مسئلے کے پرامن حل کے لیے پاکستان کی حمایت کا اعادہ کرتے ہوئے کہا کہ ایرانی جوہری پروگرام پر سفارت کاری کے تعطل نے صورتحال کو مزید پیچیدہ بنا دیا ہے۔

انہوں نے کہا کہ تنازع کے پائیدار حل کے لیے سفارت کاری کے آزمودہ اصولوں کو اپنانا ضروری ہے اور پاکستان کا مؤقف ہمیشہ یہی رہا ہے کہ مسائل کا حل مذاکرات کے ذریعے تلاش کیا جانا چاہیے۔