پاکستان سٹاک مارکیٹ میں تیزی، انڈیکس ایک لاکھ 81 ہزار پوائنٹس کی حد پر بحال

پاکستان سٹاک مارکیٹ میں مثبت رجحان اور تیزی کا سلسلہ جاری ہے، جس کے باعث 100 انڈیکس ایک لاکھ 81 ہزار پوائنٹس کی حد پر بحال ہو گیا ہے۔ کاروباری ہفتے کے چوتھے روز ٹریڈنگ کے آغاز پر ہی سٹاک ایکسچینج میں زبردست روانی دیکھنے میں آئی، جہاں انڈیکس میں 1500 سے زائد پوائنٹس کا نمایاں اضافہ ہوا اور کے ایس ای 100 انڈیکس 1 لاکھ 81 ہزار 687 پوائنٹس کی اونچی سطح پر پہنچ گیا۔

اس سے قبل گزشتہ کاروباری دن کے اختتام پر بھی سٹاک مارکیٹ میں زبردست تیزی ریکارڈ کی گئی تھی، جب انڈیکس 2931 پوائنٹس کے بڑے اضافے کے ساتھ ایک لاکھ 80 ہزار 14 پوائنٹس کی سطح پر بند ہوا تھا۔ مارکیٹ میں مسلسل اضافے کو سرمایہ کاروں کے اعتماد کی بحالی سے تعبیر کیا جا رہا ہے۔

دوسری جانب کرنسی مارکیٹ میں روپے کی قدر میں معمولی بہتری دیکھی گئی۔ انٹربینک میں امریکی ڈالر کی قیمت دورانِ ٹریڈنگ 5 پیسے کی کمی کے بعد 277.75 روپے سے گھٹ کر 277.70 روپے پر آ گئی۔