سٹاک مارکیٹ میں مندی برقرار، 100 انڈیکس 3 ہزار سے زائد پوائنٹس گر گیا

کراچی: پاکستان سٹاک مارکیٹ میں مسلسل تیسرے روز بھی شدید مندی کا راج ہے۔ کاروباری ہفتے کے پانچویں اور آخری روز (جمعہ) کاروبار کے آغاز سے ہی فروخت کا شدید دباؤ دیکھا گیا، جس کے باعث KSE-100 انڈیکس 3,000 سے زائد پوائنٹس کی کمی کے ساتھ 1,48,000 کی سطح پر ٹریڈ کر رہا ہے۔ یاد رہے کہ گزشتہ روز بھی مارکیٹ 3,500 پوائنٹس کی کمی کے ساتھ ایک لاکھ 52 ہزار 11 پوائنٹس پر بند ہوئی تھی۔

معاشی ماہرین کے مطابق، پیٹرول کی قیمت 458 روپے اور ڈیزل 520 روپے ہونے کے بعد صنعتی پیداوار میں کمی اور مہنگائی میں اضافے کے خدشات نے سرمایہ کاروں کو حصص کی فروخت پر مجبور کر دیا ہے۔ دوسری جانب، مشرقِ وسطیٰ میں ایران اور اسرائیل کے درمیان بڑھتی ہوئی کشیدگی نے عالمی مالیاتی منڈیوں کو بھی متاثر کیا ہے، جس کا براہِ راست اثر پاکستان پر پڑ رہا ہے۔