پاکستان اور روس کا تجارت، توانائی سمیت اہم شعبوں میں تعاون بڑھانے پر اتفاق

پاکستان اور روس نے تجارت، توانائی اور رابطہ کاری (Connectivity) سمیت دیگر اہم شعبوں میں دوطرفہ تعاون کو مزید وسعت دینے پر اتفاق کیا ہے۔ ترجمان دفترِ خارجہ کے مطابق نائب وزیراعظم اور وزیرِ خارجہ سینیٹر محمد اسحاق ڈار نے منیلا میں 33 ویں آسیان ریجنل فورم (ARF) کے وزارتی اجلاس کے موقع پر روسی ہم منصب سرگئی لاوروف سے اہم ملاقات کی۔ اس دوران دونوں رہنماؤں نے پاکستان اور روس کے دوطرفہ تعلقات کے ساتھ ساتھ علاقائی و عالمی امور پر تفصیلی تبادلہ خیال کیا۔ دونوں وزرائے خارجہ نے کثیرالجہتی فورمز پر باہمی تعاون کو مضبوط بنانے اور دوطرفہ شراکت داری کے فروغ کے لیے اعلیٰ سطح کے سفارتی روابط کا تسلسل برقرار رکھنے پر زور دیا۔