وفاقی حکومت کا بڑا فیصلہ؛ 1800 سی سی سے کم استعمال شدہ گاڑیوں پر ریگولیٹری ڈیوٹی کم کر کے 30 فیصد کر دی

وفاقی حکومت نے یکم جولائی سے 1800 سی سی سے کم طاقت کی استعمال شدہ گاڑیوں کی امپورٹ پر بڑی ریلیف دیتے ہوئے اضافی ریگولیٹری ڈیوٹی میں کمی کر دی ہے۔ فیڈرل بورڈ آف ریونیو (ایف بی آر) کی جانب سے جاری کردہ نوٹیفکیشن کے مطابق، ان گاڑیوں کی کمرشل درآمد پر اضافی ریگولیٹری ڈیوٹی کو 40 فیصد سے کم کر کے 30 فیصد کر دیا گیا ہے، جو کہ پہلے سے عائد دیگر ڈیوٹیز کے علاوہ ہوگی۔ ذرائع کے مطابق، حکومت کی طویل مدتی پالیسی کے تحت اس ریگولیٹری ڈیوٹی میں ہر سال 10 فیصد کمی کی جائے گی اور مالی سال 2029-30 تک اسے مکمل طور پر ختم کر دیا جائے گا۔ واضح رہے کہ حکومت نے امپورٹ پالیسی آرڈر 2022 میں ضروری ترامیم کے ذریعے استعمال شدہ گاڑیوں کی کمرشل درآمد کی اجازت دے رکھی ہے، تاہم یہ اجازت سخت ماحولیاتی اور حفاظتی معیارات کی تعمیل سے مشروط ہے۔