پاکستان نے یورو بانڈ کے ذریعے 3 ارب ڈالر حاصل کر لیے: وزیر خزانہ

وفاقی وزیر خزانہ محمد اورنگزیب نے اعلان کیا ہے کہ پاکستان نے یورو بانڈ کے ذریعے 3 ارب ڈالر حاصل کر لیے ہیں، جو ملک کی تاریخ کا سب سے بڑا بانڈ ٹرانزیکشن ہے۔ ایشیائی ترقیاتی بینک (ADB) کی تقریب سے خطاب کرتے ہوئے وزیر خزانہ نے بتایا کہ اس یورو بانڈ کے لیے آرڈر بک مطلوبہ حجم سے دوگنا رہی اور ایشیا، مشرق وسطیٰ، یورپ اور امریکہ کے سرمایہ کاروں نے اس میں شدید دلچسپی دکھائی۔ انہوں نے کہا کہ یہ کامیابی اور عالمی ریٹنگ ایجنسیوں کی جانب سے کریڈٹ ریٹنگ میں بہتری پاکستان کی معاشی پالیسیوں اور مستقبل پر عالمی برادری کے اعتماد کا مظہر ہے۔ وزیر خزانہ نے مزید واضح کیا کہ یہ اقدام بیرونی فنانسنگ کو متنوع بنانے، رول اوور رسک کم کرنے اور 3 سالہ درمیانی مدت کی حکمت عملی کا حصہ ہے، جبکہ ملک میں ٹیکس اصلاحات کے نتیجے میں وصولیوں میں بھی نمایاں بہتری آئی ہے۔