وزیراعظم شہباز شریف اور اردن کے بادشاہ عبداللہ دوم کی ملاقات، دفاعی و اقتصادی تعاون بڑھانے پر اتفاق

اسلام آباد: وزیراعظم شہباز شریف اور اردن کے بادشاہ شاہ عبداللہ دوم کے درمیان اہم ملاقات ہوئی، جس میں دونوں ممالک نے دفاعی، اقتصادی، تجارتی، سرمایہ کاری، صحت اور تعلیم سمیت کئی شعبوں میں تعاون بڑھانے پر اتفاق کیا۔ پاکستان اور اردن نے دوطرفہ تعلقات مزید مضبوط کرنے اور اسٹریٹجک و اقتصادی شراکت داری فروغ دینے کے عزم کا اظہار کیا۔

ملاقات میں شاہ عبداللہ دوم نے غزہ کے معاملے پر اردن کی حمایت پر پاکستان کے کردار کو سراہا۔ فریقین نے علاقائی سیکیورٹی، امن اقدامات اور عالمی فورمز پر مشترکہ تعاون بڑھانے پر تفصیلی گفتگو کی۔ دونوں ممالک نے فلسطینی عوام کے حقوق، غزہ سے جبری بے دخلی کی مخالفت اور آٹھ عرب اسلامی ممالک کے ساتھ قریبی کوآرڈینیشن بڑھانے پر بھی اتفاق کیا۔

ملاقات میں نائب وزیراعظم اسحاق ڈار، فیلڈ مارشل عاصم منیر اور وفاقی وزرا نے شرکت کی۔ وزیراعظم شہباز شریف نے شاہ عبداللہ دوم کو افغانستان اور بھارت سے متعلق صورتحال سے آگاہ کیا، جبکہ شاہ عبداللہ نے علاقائی امن کے لیے پاکستان کے مثبت کردار کی تعریف کی۔

دونوں ممالک کے درمیان میڈیا، ثقافت اور تعلیم کے شعبوں میں تعاون بڑھانے کے لیے مفاہمتی یادداشتوں پر دستخط بھی کیے گئے۔ وزیراعظم نے شاہ عبداللہ دوم کے اعزاز میں عشائیہ دیا۔

اسلام آباد ایئرپورٹ پر صدر مملکت آصف علی زرداری اور وزیراعظم شہباز شریف نے شاہ عبداللہ دوم کا استقبال کیا، جبکہ وزیراعظم ہاؤس میں منعقدہ استقبالیہ میں گارڈ آف آنر پیش کیا گیا۔