آزادی کا جشن: آسمان رنگ و نور سے روشن، شہر شہر شاندار آتشبازی کا مظاہرہ

پاکستان کے یومِ آزادی پر ملک بھر میں جشن کا سماں بندھ گیا اور مختلف شہروں میں آتشبازی کے شاندار مظاہروں سے آسمان رنگ و نور سے جگمگا اٹھا۔ لاہور کے لبرٹی چوک اور تاریخی مینارِ پاکستان پر آتشبازی کے مظاہرے کیے گئے، جبکہ کراچی کے پورٹ گرینڈ، پشاور کے قیوم سپورٹس کمپلیکس اور ملتان کے گھنٹہ گھر چوک پر بھی دلکش آتشبازی کا اہتمام کیا گیا۔ پورا ملک سبز و سفید رنگوں میں رنگ گیا اور گلیوں، شاہراہوں و اہم عمارتوں کو دلکش برقی قمقموں سے سجا دیا گیا۔ لاہور میں جشن کو دو آتشہ کرنے کے لیے لبرٹی چوک پر میگا میوزیکل کنسرٹ اور ٹاؤن ہال میں شاندار لائٹ اینڈ پروجیکشن شو منعقد کیا گیا۔ اس موقع پر قوم بالخصوص نوجوان ہاتھوں میں قومی پرچم اور جھنڈیاں تھامے سڑکوں پر نکل آئے اور فضا ‘پاکستان زندہ باد’ کے فلک شگاف نعروں سے گونجتی رہی۔