پاکستان ہائی کمیشن نئی دہلی میں وطنِ عزیز کا 79واں یومِ آزادی روایتی جوش و جذبے، ملی ہم آہنگی اور شایانِ شان انداز میں منایا گیا۔ چانسری لان میں منعقدہ پروقار تقریب کے دوران بھارت میں پاکستان کے ناظم الامور سعد احمد وڑائچ نے قومی ترانے کی دھن پر پرچم کشائی کی، جس میں ہائی کمیشن کے اراکین اور ان کے اہل خانہ نے بڑی تعداد میں شرکت کی۔ اس موقع پر صدرِ مملکت، وزیراعظم اور نائب وزیراعظم و وزیر خارجہ کے خصوصی پیغامات بھی پڑھ کر سنائے گئے۔

تقریب سے خطاب کرتے ہوئے ناظم الامور سعد احمد وڑائچ نے بانیِ پاکستان قائدِ اعظم محمد علی جناحؒ کی قیادت اور شہداء کی قربانیوں کو خراجِ تحسین پیش کیا اور کہا کہ پاکستان کی جوہری صلاحیت جنوبی ایشیا میں توازن اور استحکام کا باعث ہے۔ انہوں نے پاکستان، سعودی عرب اور ترکیہ کے درمیان ہونے والے تاریخی معاہدے کو علاقائی و عالمی امن کے لیے اہم سنگِ میل قرار دیا، جبکہ اس بات پر زور دیا کہ جنوبی ایشیا میں پائیدار امن کی راہ تنازعہِ جموں و کشمیر کو اقوامِ متحدہ کی قراردادوں کے مطابق حل کرنے سے ہی ممکن ہے۔ تقریب کے دوران روایتی لباس میں ملبوس بچوں نے ملی نغمے پیش کیے، کیک کاٹا گیا اور ناظم الامور نے قائدِ اعظم کی 150ویں سالگرہ کے تناظر میں ان کی زندگی اور جدوجہد پر مبنی خصوصی تصویری نمائش کا افتتاح بھی کیا۔