پاکستان ہائی کمیشن لندن میں پاکستان کے یومِ آزادی کی شاندار تقریب

پاکستان ہائی کمیشن لندن میں پاکستان کا 79واں یومِ آزادی روایتی جوش و جذبے، ملی ٹیلنٹ اور شاندار تقریبات کے ساتھ منایا گیا۔ اس پروقار تقریب میں چیئرمین کشمیر کمیٹی رانا محمد قاسم نون نے بطور مہمانِ خصوصی شرکت کی، جبکہ برطانوی پاکستانی کمیونٹی کی کثیر تعداد، میڈیا نمائندگان اور ہائی کمیشن کے افسران و ان کے اہل خانہ بھی بڑی تعداد میں موجود تھے۔ تقریب کا باقاعدہ آغاز تلاوتِ کلامِ پاک سے ہوا، جس کے بعد برطانیہ میں پاکستان کے ہائی کمشنر ٹیپو عثمان نے قومی ترانے کی فضا میں پرچم کشائی کی۔ اس موقع پر صدر، وزیراعظم اور نائب وزیراعظم و وزیر خارجہ کے خصوصی پیغامات بھی پڑھ کر سنائے گئے۔

اپنے خطاب میں ہائی کمشنر ٹیپو عثمان نے قائدِ اعظم محمد علی جناحؒ اور تحریکِ پاکستان کے تمام شہداء و مجاہدین کو خراجِ تحسین پیش کرتے ہوئے کہا کہ بیرونِ ملک خصوصاً برطانیہ میں مقیم پاکستانی ملک کے حقیقی سفیر ہیں جو دونوں ممالک کے معاشی و سفارتی تعلقات کو مضبوط بنانے میں پل کا کردار ادا کر رہے ہیں۔ انہوں نے بھارتی غیر قانونی زیرِ قبضہ جموں و کشمیر کے غیور عوام کے حقِ خودارادیت کی اخلاقی، سیاسی اور سفارتی حمایت جاری رکھنے کے پاکستان کے غیر متزلزل عزم کا بھی اعادہ کیا۔ تقریب کے آخر میں معروف برطانوی پاکستانی سوپرانو گلوکارہ سائرہ پیٹر نے ملکی نغمے پیش کر کے سامعین کو محظوظ کیا، بچوں کے ملی نغموں نے رنگ بھرا اور ہائی کمشنر نے معزز مہمانوں کے ہمراہ آزادی کا کیک کاٹا۔