پیرس میں ‘انویسٹ ان پاکستان’ کی گونج: پاکستان–فرانس ٹریڈ اینڈ انویسٹمنٹ فورم کا کامیاب انعقاد

پیرس: فرانس کے دارالحکومت پیرس میں پاکستان اور فرانس کے درمیان تجارتی و سرمایہ کاری تعلقات کو مستحکم کرنے کے لیے ایک اعلیٰ سطحی فورم کا انعقاد کیا گیا۔ فورم کا افتتاح فرانس میں پاکستان کی سفیر ممتاز زہرہ بلوچ نے کیا، جس میں دونوں ممالک کے سرکاری حکام اور کاروباری برادری کے سرکردہ رہنماؤں نے بڑی تعداد میں شرکت کی۔

فورم کے دوران پاکستان کی جانب سے حالیہ اقتصادی اصلاحات اور سرمایہ کاروں کے لیے فراہم کی جانے والی سہولیات کو اجاگر کیا گیا۔ 70 سے زائد پاکستانی اور فرانسیسی کمپنیوں نے بی ٹو بی (B2B) سیشنز میں حصہ لیا، جہاں زراعت، انفارمیشن ٹیکنالوجی (IT)، ٹیکسٹائل، توانائی اور سیاحت کے شعبوں میں تعاون کے وسیع مواقع تلاش کیے گئے۔ فرانسیسی کاروباری رہنماؤں نے پاکستان کے نجی شعبے کے ساتھ طویل مدتی شراکت داری اور مشترکہ منصوبوں (Joint Ventures) میں گہری دلچسپی کا اظہار کیا۔

وفاقی وزیر تجارت جام کمال خان نے اس فورم کو پاکستان کے تجارتی وژن کی حقیقی عکاسی قرار دیتے ہوئے کہا کہ عالمی تجارتی روابط کے فروغ میں ایسے پلیٹ فارمز کلیدی اہمیت رکھتے ہیں۔ انہوں نے اس بات پر زور دیا کہ نجی شعبے کے درمیان مضبوط روابط ہی دونوں ممالک کے اقتصادی تعلقات کو نئی بلندیوں تک پہنچا سکتے ہیں۔