پاکستان اور فرانس کا کثیرالجہتی امور پر تعاون مزید مضبوط بنانے پر اتفاق

پاکستان اور فرانس کے درمیان کثیرالجہتی امور اور دوطرفہ تعلقات کے فروغ کے حوالے سے اعلیٰ سطح کا مشاورتی اجلاس پیرس میں منعقد ہوا، جس میں دونوں ممالک کے درمیان مختلف شعبوں میں تعاون کو وسعت دینے اور اہم عالمی و علاقائی امور پر سیر حاصل تبادلہ خیال کیا گیا۔ ترجمان دفتر خارجہ کے مطابق یہ مشاورت 2023 میں طے پانے والے دوطرفہ روڈ میپ کے تحت منعقد کی گئی، جس کا بنیادی مقصد کثیرالجہتی شعبوں میں باہمی روابط کو مضبوط بنانا اور درپیش عالمی چیلنجز سے نمٹنے کے لیے مشترکہ کوششوں کو تیز کرنا ہے۔

اجلاس کے دوران پاکستان اور فرانس نے دوطرفہ مذاکرات کے سلسلے کو جاری رکھنے اور باہمی تعاون کو مزید فعال بنانے کے عزم کا اعادہ کیا۔ فریقین نے عالمی امن و سلامتی سمیت مختلف بین الاقوامی فورمز پر رابطوں کو مستحکم کرنے پر اتفاق کیا۔ گفتگو کے دوران اقوامِ متحدہ کے امن مشنز، عالمی ادارے کی اصلاحات اور انسدادِ دہشت گردی جیسے اہم ترین موضوعات پر بھی تفصیلی بات چیت کی گئی۔ دونوں ممالک نے اس عزم کا اظہار کیا کہ کثیرالجہتی مشاورتی عمل کا اگلا دور اسلام آباد میں منعقد کیا جائے گا۔