پاکستان کا سوڈان کے تمام فریقین سے فوری اور مستقل جنگ بندی پر عملدرآمد کا مطالبہ

پاکستان نے جنوبی سوڈان میں بگڑتی ہوئی سیاسی اور سیکیورٹی صورتحال پر گہری تشویش کا اظہار کرتے ہوئے تمام فریقین پر زور دیا ہے کہ وہ تجدید شدہ امن معاہدے پر ازسرِنو عمل درآمد کے لیے اپنی وابستگی کا اعادہ کریں۔ اقوامِ متحدہ میں پاکستان کے مستقل مندوب عاصم افتخار احمد نے سلامتی کونسل کے اجلاس سے خطاب کرتے ہوئے کہا کہ ملک میں جمہوری انتقالِ اقتدار کی کامیابی کے لیے آزاد، منصفانہ اور شفاف انتخابات کا انعقاد ناگزیر ہے، تاہم اس کے لیے ضروری سیاسی، قانونی، سیکیورٹی اور مالی تقاضوں کا پورا ہونا ابھی باقی ہے۔ انہوں نے جونگلے اور اپر نیل سمیت مختلف علاقوں میں جاری بین القبائلی تشدد اور جھڑپوں پر تشویش جتاتے ہوئے فوری و مستقل جنگ بندی، اشتعال انگیز بیانات سے گریز اور مذاکرات کا مطالبہ کیا۔ پاکستانی مندوب نے جنوبی سوڈان میں اقوامِ متحدہ کے مشن (UNMISS) کی خدمات کو سراہتے ہوئے کہا کہ سیکیورٹی چیلنجز کے پیشِ نظر مشن کی منظور شدہ فوجی استعداد (12,500) کو مکمل طور پر بروئے کار لایا جانا چاہیے تاکہ شہریوں کا تحفظ اور انسانی امداد کی فراہمی ممکن بنائی جا سکے