پاکستان اور چینی کمپنیوں کے درمیان 7 ارب ڈالر سے زائد کے معاہدوں پر دستخط

وزیراعظم کے دورۂ چین کے دوران پاکستان اور چین کی کمپنیوں کے درمیان سات ارب ڈالر سے زائد مالیت کے معاہدوں اور مفاہمت کی یادداشتوں پر دستخط کیے گئے ہیں۔

سرکاری اعلامیے کے مطابق دونوں ممالک کی کمپنیوں کے درمیان سرمایہ کاری اور باہمی تعاون کے فروغ کے لیے مختلف شعبوں میں اہم معاہدے طے پائے ہیں جن کی مجموعی مالیت سات ارب ڈالر سے تجاوز کر گئی ہے۔

وزیراعظم نے اس موقع پر چینی سرمایہ کاروں کو پاکستان کے زراعت، اطلاعاتی ٹیکنالوجی، خصوصی اقتصادی زونز، کان کنی اور معدنیات سمیت مختلف شعبوں میں سرمایہ کاری کی دعوت دی۔

وزیراعظم شہباز شریف نے کہا کہ پاکستان کو محض قرضوں اور امداد کی نہیں بلکہ مہارت اور سرمایہ کاری کی ضرورت ہے۔ ان کے مطابق کسی بھی قوم کی حقیقی ترقی بخشش یا امداد سے نہیں بلکہ خود انحصاری اور مضبوط معاشی بنیادوں سے ممکن ہے۔

انہوں نے کہا کہ معاہدوں کو عملی سرمایہ کاری میں تبدیل کرنا وقت کی اہم ضرورت ہے۔ کراچی کے خصوصی اقتصادی زون میں سرمایہ کاروں کو پرکشش سہولیات فراہم کی جائیں گی جبکہ جدید زرعی طریقوں کے ذریعے چین کو زرعی مصنوعات کی برآمدات میں نمایاں اضافہ کیا جا سکتا ہے۔

وزیراعظم نے مزید کہا کہ پاکستان میں معدنی وسائل کے بڑے ذخائر موجود ہیں اور درست پالیسیوں کے ذریعے ملک کو معاشی ترقی کی راہ پر تیزی سے آگے لے جایا جا سکتا ہے۔

انہوں نے چینی صدر شی جن پنگ کی قیادت کو سراہتے ہوئے کہا کہ چین نے عالمی سطح پر معاشی اور دفاعی میدان میں نمایاں ترقی حاصل کی ہے اور پاکستان بھی جلد خطے میں ترقی کے سفر میں چین کے ساتھ قدم سے قدم ملا کر آگے بڑھے گا۔

امریکی صدر کی حالیہ سوشل میڈیا پوسٹ کے بعد عالمی سطح پر سفارتی ماحول میں تبدیلی کے اشارے سامنے آ رہے ہیں، جسے مبصرین خطے میں کشیدگی میں کمی کی ممکنہ علامت قرار دے رہے ہیں۔