بنگلادیش ون ڈے سیریز میں 3 کھلاڑی ڈیبیو کریں گے، کپتان شاہین آفریدی

ڈھاکا: پاکستان ون ڈے ٹیم کے کپتان شاہین شاہ آفریدی نے بنگلا دیش کے خلاف سیریز سے قبل پریس کانفرنس کرتے ہوئے کہا ہے کہ ٹیم کو آئندہ ورلڈ کپ کے لیے تیار کیا جا رہا ہے اور نوجوان کھلاڑیوں کو زیادہ مواقع دیے جائیں گے۔

انہوں نے بتایا کہ بنگلا دیش کے خلاف تین کھلاڑی معاذ صداقت، صاحبزادہ فرحان اور شمائل حسین ون ڈے ڈیبیو کریں گے۔ کپتان کے مطابق معاذ صداقت اوپننگ کریں گے جبکہ شمائل حسین ون ڈاؤن پوزیشن پر بیٹنگ کریں گے۔

شاہین آفریدی نے کہا کہ ٹیم اور پچ کی صورتحال کو مدنظر رکھتے ہوئے پلیئنگ الیون کا فیصلہ کیا جائے گا۔ ان کا کہنا تھا کہ اسکواڈ میں شامل زیادہ تر کھلاڑی لسٹ اے کرکٹ اور پاکستان شاہینز کی جانب سے کھیل چکے ہیں اور کچھ کھلاڑی پہلے بھی بنگلا دیش میں کھیلنے کا تجربہ رکھتے ہیں۔

انہوں نے مزید کہا کہ ہوم کنڈیشنز میں ہر ٹیم بہتر کارکردگی دکھاتی ہے لیکن پاکستانی ٹیم بھی اچھی تیاری کے ساتھ میدان میں اترے گی۔

پاکستان اور بنگلا دیش کے درمیان تین میچوں پر مشتمل ون ڈے سیریز کا پہلا میچ کل کھیلا جائے گا جبکہ دوسرا اور تیسرا میچ بالترتیب 13 اور 15 مارچ کو ہوگا۔ سیریز کے تینوں میچ ڈھاکا کے شیر بنگلا نیشنل اسٹیڈیم میں کھیلے جائیں گے۔