پاکستان نے اقوام متحدہ کی کانفرنس برائے تخفیف اسلحہ کی صدارت سنبھال لی

ترجمان دفترِ خارجہ کے مطابق پاکستان نے اقوام متحدہ کی کانفرنس برائے تخفیفِ اسلحہ (Conference on Disarmament) کی صدارت باقاعدہ طور پر سنبھال لی ہے۔ جنیوا میں جاری اجلاسوں کی صدارت ایڈیشنل سیکریٹری اسلحہ کنٹرول و تخفیفِ اسلحہ طاہر اندرابی کر رہے ہیں۔ پاکستان سال 2026 کے اجلاس کے آخری صدر کے طور پر خدمات انجام دے رہا ہے، جس کے تحت وہ سالانہ رپورٹ کی تیاری اور اقوام متحدہ کی جنرل اسمبلی کی فرسٹ کمیٹی میں قرارداد پر مذاکرات کی رہنمائی کرے گا۔ اس موقع پر طاہر اندرابی نے سابق صدور اور مختلف علاقائی گروپس کے نمائندوں سے مشاورتی اجلاس کی صدارت بھی کی۔ 65 رکن ممالک پر مشتمل یہ دنیا کا واحد کثیرالجہتی فورم ہے جہاں تمام جوہری طاقتیں شامل ہیں اور اس کے ایجنڈے میں جوہری ہتھیاروں کی دوڑ کا خاتمہ اور خلا کی عسکریت پسندی کی روک تھام جیسے اہم امور شامل ہیں۔